પાન-મસાલાના શોખીનોને મોટો ઝટકો! FSSAIનો મોટો નિર્ણય, પ્લાસ્ટિક પેકેજિંગ પર પ્રતિબંધ
પાન-મસાલાના ઉત્પાદકો અને ગ્રાહકો માટે મહત્વના સમાચાર સામે આવ્યા છે. ભારતીય ખાદ્ય સુરક્ષા અને માનક પ્રાધિકરણ (FSSAI) દ્વારા પાન-મસાલાના પેકેજિંગને લઈને નવા નિયમો જાહેર કરવામાં આવ્યા છે. નવા નિયમો હેઠળ પાન-મસાલાના પેકિંગમાં પ્લાસ્ટિક આધારિત સામગ્રીના ઉપયોગ પર પ્રતિબંધ મૂકવામાં આવ્યો છે.
FSSAI દ્વારા Food Safety and Standards (Packaging) Amendment Regulations, 2026 હેઠળ પાન-મસાલાને પેક કરવા માટે મંજૂર સામગ્રી અંગે નવા નિયમો નક્કી કરવામાં આવ્યા છે. આ નિયમો મુજબ પાન-મસાલાનું પેકેજિંગ પ્લાસ્ટિકથી સંપૂર્ણપણે મુક્ત હોવું જરૂરી રહેશે.
કઈ વસ્તુઓ પર પ્રતિબંધ?
નવા નિયમો અનુસાર પાન-મસાલાના પેકેજિંગમાં પ્લાસ્ટિક ઉપરાંત એલ્યુમિનિયમ ફોઇલ, મેટલાઇઝ્ડ લેયર્સ અને પ્લાસ્ટિક આધારિત લેમિનેટ્સનો ઉપયોગ પણ કરી શકાશે નહીં.
હવે કયા પેકેજિંગનો ઉપયોગ કરી શકાશે?
પાન-મસાલા માટે કાગળ, પેપરબોર્ડ, સેલ્યુલોઝ અથવા અન્ય કુદરતી રીતે મેળવવામાં આવેલી સામગ્રીનો ઉપયોગ કરી શકાશે, પરંતુ તેમાં કોઈપણ પ્રકારનું પ્લાસ્ટિક કે સિન્થેટિક પોલિમર ન હોવું જોઈએ. નિયમોમાં ટીન અને ગ્લાસ કન્ટેનરનો વિકલ્પ પણ આપવામાં આવ્યો છે.
કંપનીઓ પર શું અસર થશે?
નવા નિયમોને કારણે પાન-મસાલા બનાવતી કંપનીઓએ પોતાની પેકેજિંગ સિસ્ટમમાં ફેરફાર કરવો પડશે. પ્લાસ્ટિક આધારિત પાઉચ અને લેમિનેટેડ પેકેજિંગના બદલે વૈકલ્પિક સામગ્રીનો ઉપયોગ કરવો પડશે. તેના કારણે કંપનીઓના પેકેજિંગ ડિઝાઇન, ઉત્પાદન પ્રક્રિયા અને ખર્ચ પર અસર થવાની શક્યતા છે.
ગ્રાહકો માટે શું બદલાશે?
ગ્રાહકોને પાન-મસાલાના પેકેટના દેખાવ અને પેકેજિંગમાં ફેરફાર જોવા મળી શકે છે. જોકે, આ નિર્ણય પાન-મસાલાના વેચાણ પર સીધો પ્રતિબંધ નથી, પરંતુ તેના પેકેજિંગ માટેના નિયમોને કડક બનાવે છે.
FSSAIની સત્તાવાર સૂચનાઓમાં પાન-મસાલા માટે પેકેજિંગ સામગ્રી અંગે 2026માં નિયમનાત્મક પ્રક્રિયા જાહેર કરવામાં આવી હતી.
વધુ સમાચાર માટે અહીં ક્લિક કરો