congress ગુજરાતમાં SIR મુદ્દે કોંગ્રેસનો ઉગ્ર વિરોધ, રાજકોટ-સુરત-વડોદરામાં પોલીસ સાથે ઘર્ષણ
congress SIR પ્રક્રિયાને લઈને ગુજરાતમાં રાજકીય માહોલ ગરમાયો છે. મતદાર યાદીમાંથી મોટી સંખ્યામાં નામો દૂર કરવામાં આવ્યા હોવાના કોંગ્રેસના આક્ષેપો વચ્ચે મુખ્ય ચૂંટણી કમિશનર જ્ઞાનેશ કુમારના રાજીનામાની માગ સાથે કોંગ્રેસે રાજ્યના વિવિધ શહેરોમાં વિરોધ પ્રદર્શન યોજ્યાં હતાં.
congress રાજકોટ, સુરત, વડોદરા અને જૂનાગઢ સહિતના શહેરોમાં કોંગ્રેસના કાર્યકરોએ સૂત્રોચ્ચાર, દેખાવો અને આવેદનપત્ર આપીને ચૂંટણી પ્રક્રિયા અંગે સવાલો ઉઠાવ્યા હતા. કેટલાક સ્થળોએ પ્રદર્શન દરમિયાન પોલીસ સાથે ઘર્ષણની સ્થિતિ પણ સર્જાઈ હતી.
congress રાજકોટમાં અનોખી રીતે વિરોધ
રાજકોટ શહેર કોંગ્રેસ દ્વારા પ્રતિકાત્મક વિરોધ કરવામાં આવ્યો હતો. એક કાર્યકરને મુખ્ય ચૂંટણી કમિશનર જ્ઞાનેશ કુમારનું મહોરું પહેરાવી દોરડાથી બાંધીને કલેક્ટર કચેરી સુધી લઈ જવામાં આવ્યો હતો.
કોંગ્રેસના આગેવાનો દ્વારા આ પ્રદર્શનને ચૂંટણી પંચની સ્વાયત્તતા અને મતદાર યાદી અંગેના પોતાના વિરોધના પ્રતિક તરીકે રજૂ કરવામાં આવ્યું હતું. વિરોધ દરમિયાન જ્ઞાનેશ કુમારના નામ સાથેના પોસ્ટર અને સૂત્રોચ્ચાર પણ કરવામાં આવ્યા હતા.
congress સુરતમાં બેરિકેડ્સ તોડવાનો પ્રયાસ
સુરતમાં શહેર અને જિલ્લા કોંગ્રેસના કાર્યકરોએ કલેક્ટર કચેરી ખાતે વિરોધ નોંધાવ્યો હતો. કાર્યકરોએ સૂત્રોચ્ચાર સાથે કચેરી તરફ આગળ વધવાનો પ્રયાસ કરતાં પોલીસ દ્વારા બેરિકેડ્સ ગોઠવવામાં આવ્યા હતા.
પ્રદર્શન દરમિયાન કેટલાક કાર્યકરોએ બેરિકેડ્સ દૂર કરવાનો પ્રયાસ કર્યો હતો. પોલીસે સ્થિતિ નિયંત્રણમાં લેવા માટે કેટલાક કાર્યકરોની અટકાયત કરી હતી. આ દરમિયાન પોલીસ અને પ્રદર્શનકારીઓ વચ્ચે ધક્કામુક્કીના દૃશ્યો પણ જોવા મળ્યા હતા.
congress વડોદરામાં કાળા વસ્ત્રો સાથે વિરોધ
વડોદરામાં પૂર્વ કેન્દ્રીય મંત્રી ભરતસિંહ સોલંકીની આગેવાની હેઠળ કોંગ્રેસના કાર્યકરો કાળા વસ્ત્રો અને કાળી પટ્ટી સાથે વિરોધમાં જોડાયા હતા.
પ્રદર્શનકારીઓએ ચૂંટણી પંચની કામગીરી અંગે સવાલો ઉઠાવતા બેનરો દર્શાવ્યા હતા અને મુખ્ય ચૂંટણી કમિશનરના રાજીનામાની માગ કરી હતી. વિરોધ દરમિયાન પૂતળાદહનના પ્રયાસને પગલે પોલીસ અને કોંગ્રેસ કાર્યકરો વચ્ચે ઘર્ષણની સ્થિતિ સર્જાઈ હતી.
કોંગ્રેસના કાર્યકરોએ મતાધિકાર અને મતદાર યાદીની પારદર્શિતા અંગે પોતાની ચિંતા વ્યક્ત કરી હતી.
congress જૂનાગઢમાં કલેક્ટરને આવેદનપત્ર
જૂનાગઢમાં પણ કોંગ્રેસ દ્વારા વિરોધ કાર્યક્રમ યોજાયો હતો. કોંગ્રેસના નેતા કરશનદાસ ભાદરકા સહિતના કાર્યકરોએ મતદાર યાદી અને SIR પ્રક્રિયા અંગે રજૂઆત કરી હતી.
કોંગ્રેસે મતદાર યાદીમાંથી નામો દૂર કરવા અંગે આક્ષેપો કરી જિલ્લા કલેક્ટરને આવેદનપત્ર પાઠવ્યું હતું અને સમગ્ર પ્રક્રિયામાં પારદર્શિતા જાળવવાની માગ કરી હતી.
congress કોંગ્રેસના આક્ષેપો વચ્ચે SIR મુદ્દે રાજકીય ગરમાવો
SIR પ્રક્રિયાને લઈને કોંગ્રેસ દ્વારા દેશભરમાં મોટી સંખ્યામાં મતદારોના નામ મતદાર યાદીમાંથી દૂર કરવામાં આવ્યા હોવાના આક્ષેપો કરવામાં આવી રહ્યા છે. બીજી તરફ, મતદાર યાદીની સુધારણા અને ચકાસણીને લઈને ચૂંટણી તંત્ર તરફથી પ્રક્રિયા હાથ ધરવામાં આવી રહી છે.
congress ગુજરાતમાં કોંગ્રેસના વિરોધ પ્રદર્શનોને કારણે રાજકોટ, સુરત અને વડોદરામાં પોલીસ બંદોબસ્ત વધારવાની સ્થિતિ સર્જાઈ હતી. સમગ્ર મુદ્દે રાજકીય પક્ષો વચ્ચે આરોપ-પ્રત્યારોપનો દોર યથાવત છે.
