લોકસભામાં એન્ટી પેપર લીક બિલ ધ્વનિમતથી પાસ, 10 કલાકની ચર્ચા બાદ મળી મંજૂરી
લોકસભામાં જાહેર પરીક્ષાઓમાં પેપર લીક અને ગેરરીતિઓને રોકવાના હેતુથી લાવવામાં આવેલા એન્ટી પેપર લીક (સુધારા) બિલને ધ્વનિમતથી મંજૂરી આપવામાં આવી છે. બિલ પર બે દિવસ સુધી ચાલેલી અંદાજે 10 કલાકની વિસ્તૃત ચર્ચા બાદ કેન્દ્રીય રાજ્યમંત્રી ડૉ. જીતેન્દ્ર સિંહે સરકારનો જવાબ રજૂ કર્યો અને ત્યારબાદ બિલ પસાર કરવામાં આવ્યું.
ચર્ચા દરમિયાન લોકસભામાં વિપક્ષ દ્વારા હોબાળો અને સૂત્રોચ્ચાર કરવામાં આવ્યા હતા. તેમ છતાં ગૃહની કાર્યવાહી ચાલુ રાખી બિલ ધ્વનિમતથી પસાર કરવામાં આવ્યું. ડૉ. જીતેન્દ્ર સિંહે જણાવ્યું કે પેપર લીક જેવા ગંભીર મુદ્દાને રાજકીય રંગ આપવો યોગ્ય નથી અને સરકાર પરીક્ષાઓને વધુ પારદર્શક અને વિશ્વસનીય બનાવવા માટે પ્રતિબદ્ધ છે.
ચર્ચા દરમિયાન કોંગ્રેસના નેતા રાહુલ ગાંધી અને અન્ય વિપક્ષી સભ્યોએ સરકાર પર પેપર લીકની ઘટનાઓને લઈને સવાલો ઉઠાવ્યા. તેના જવાબમાં ડૉ. જીતેન્દ્ર સિંહે અગાઉ નોંધાયેલી એફઆઈઆર અને સરકાર દ્વારા લેવાયેલા પગલાંનો ઉલ્લેખ કર્યો. તેમણે દાવો કર્યો કે દેશમાં ઉચ્ચ શિક્ષણની તકોમાં લગભગ 30 ટકા વધારો થયો છે અને પરીક્ષા વ્યવસ્થાને વધુ મજબૂત બનાવવા માટે આ બિલ મહત્વપૂર્ણ સાબિત થશે.
આ દરમિયાન રાજ્યસભામાં પણ વિપક્ષે સીપીએમના દિલ્હી કાર્યાલય પર થયેલી કાર્યવાહીનો મુદ્દો ઉઠાવી હોબાળો કર્યો. વિપક્ષના નેતા મલ્લિકાર્જુન ખડગેએ સરકારની ટીકા કરી હતી, જ્યારે ગૃહના નેતા જેપી નડ્ડાએ સરકારનો બચાવ કરતાં જણાવ્યું કે કાયદાકીય કાર્યવાહી સામાન્ય પ્રક્રિયાનો ભાગ છે.
એન્ટી પેપર લીક બિલ પસાર થતાં હવે જાહેર પરીક્ષાઓમાં ગેરરીતિઓ અને પેપર લીકના કેસો સામે વધુ કડક કાનૂની કાર્યવાહીનો માર્ગ વધુ મજબૂત બનશે.
