અંજારમાં ઉગ્ર ઝઘડો થતાં CRPFમાં ફરજ બજાવતા પ્રેમીએ મહિલા ASIનું ગળું દબાવી હત્યા કરી
અંજાર શહેરમાં ફરજ બજાવતાં આસિસ્ટન્ટ સબ-ઇન્સ્પેક્ટર (ASI) અરુણાબેન જાદવની હત્યા કરવામાં આવી છે. પ્રેમી અને અરુણાબેન વચ્ચે ઝઘડો થતાં પ્રેમીએ ગળું દબાવી દીધું હતું. હત્યાની ઘટના બનતાં પોલીસબેડામાં ખળભળાટ મચી ગયો છે.
આ ઘટના ગઈ મોડીરાત્રે ગંગોત્રી સોસાયટી-2માં અરુણાબેનના નિવાસસ્થાને બની હતી. મળતી માહિતી મુજબ, મૂળ સુરેન્દ્રનગર જિલ્લાના દેરવાડા ગામના વતની અરુણાબેન અને તેમના પુરુષ મિત્ર દિલીપ ડાંગચિયા વચ્ચે કોઈ પારિવારિક બાબતને લઈને ઉગ્ર બોલાચાલી થઈ હતી.
આ બોલાચાલી એટલી હદે વણસી ગઈ કે દિલીપે ગુસ્સામાં આવી અરુણાબેનનું ગળું દબાવી દીધું હતું. એના કારણે તેમનું ઘટનાસ્થળે જ મોત નીપજ્યું. આરોપી દિલીપ ડાંગચિયા પણ સેન્ટ્રલ રિઝર્વ પોલીસ ફોર્સ (CRPF)માં ફરજ બજાવે છે અને હાલ મણિપુરમાં તેનું પોસ્ટિંગ છે. આશ્ચર્યજનક રીતે અરુણાબેનની હત્યા કર્યા બાદ દિલીપ પોતે જ પોલીસ મથકે હાજર થઈ ગયો હતો અને ગુનાની કબૂલાત કરી હતી.