મુંબઈમાં છેલ્લાં બે અઠવાડિયાંથી કોરોનાએ ફરી માથું ઊંચક્યું છે. એમાં ત્રણ દિવસમાં કચ્છી વીસા ઓસવાળ જૈન સમાજના ૧૦ જેટલા લોકોએ જીવ ગુમાવ્યા હોવાથી સમાજમાં એ ચર્ચાનો વિષય બની ગયો છે. મુંબઈમાં વસતા સમાજના લોકો કોવિડના સંપર્કમાં ન આવે એ માટે સમાજની શ્રી ક.વી.ઓ. જૈન ખબરપત્રિકા સમિતિએ અનોખી પહેલ કરી છે. દરરોજ સમાજના લોકો કોવિડથી મૃત્યુના મુખમાં ધકેલાઈ રહ્યા હોવાની માહિતી લોકો સુધી પહોંચે અને તેમનામાં જાગૃતિ આવે એ માટે પત્રિકા સમિતિએ કોવિડથી મૃત્યુ પામનારા લોકોની મરણ-ખબરમાં કોવિડથી મૃત્યુ થયાની નોંધ લખવાની શરૂઆત કરી છે. મોટા ભાગના લોકો કોવિડથી મૃત્યુના સમાચાર છુપાવી રહ્યા છે ત્યારે આ મહામારીથી મૃત્યુ થવાની જાહેરમાં નોંધ કરવામાં આવી રહી છે.
શ્રી કચ્છી વીસા ઓસવાળ જૈન ખબરપત્રિકામાં સમાજના લોકો માટે સાહિત્ય પીરસવામાં આવે છે. આ પત્રિકાનું સંચાલન સમિતિ દ્વારા કરવામાં આવે છે. મુંબઈ અને આસપાસમાં ૪૦ હજાર જેટલા કચ્છી વીસા ઓસવાળ પરિવાર વસે છે. આ સમાજમાં છેલ્લા કેટલાક સમયથી કોવિડને લીધે મૃત્યુ થવાના કેસમાં વધારો થયો હોવાથી પત્રિકા સમિતિ દ્વારા જે પરિવારમાં મરણ થયું હોય તેમને મરણ-ખબરમાં કોવિડથી મૃત્યુ થયું હોવાનું લખવાની વિનંતી કરી હતી, જે સૌએ માન્ય કરતાં છેલ્લા કેટલાક સમયથી ખબરપત્રિકામાં આ પ્રકારની નોંધ લેવાય છે. એટલું જ નહીં, ખબરપત્રિકાના લાસ્ટ પેજ પર લોકોએ કોરોનાથી બચવા માટે કેવાં પગલાં લેવાં જોઈએ એની સૂચના લખવામાં આવે છે. કોરોનાથી મૃત્યુ થાય તો એનો ક્ષોભ અનુભવવાને બદલે એ જાહેર કરવાથી મૃતકના સંપર્કમાં આવનારા લોકો સમયસર કોવિડની ટેસ્ટ કરી શકે એ માટેની અપીલ પણ કરાય છે.
