રાંચીમાં રણસંગ્રામ! JPSC-JSSC પરીક્ષાની CBI તપાસની માંગ સાથે વિદ્યાર્થીઓ વિધાનસભામાં ઘૂસ્યા, ટીયર ગેસ-લાઠીચાર્જથી હંગામો
રાંચી: ઝારખંડની રાજધાની રાંચીમાં JPSC અને JSSC-CGL પરીક્ષામાં કથિત ગેરરીતિ તથા પેપર લીકની CBI તપાસ સહિતની વિવિધ માંગણીઓને લઈને ચાલી રહેલું વિદ્યાર્થી આંદોલન સોમવારે ઉગ્ર બની ગયું હતું. ‘વિધાનસભા ઘેરાવ’ના એલાન સાથે મોટી સંખ્યામાં વિદ્યાર્થીઓ રસ્તા પર ઉતરી આવ્યા હતા. વિદ્યાર્થીઓએ પોલીસના બેરિકેડ્સ તોડી વિધાનસભા પરિસરમાં પ્રવેશ કરી ગેટ નંબર-1 પાસે જ ધરણાં શરૂ કરી દીધાં હતાં.
કાંટાળા તાર અને બેરિકેડ્સ પણ વિદ્યાર્થીઓને રોકી ન શક્યા
વિદ્યાર્થીઓને વિધાનસભા તરફ આગળ વધતા રોકવા માટે પોલીસે રસ્તા પર ભારે બેરિકેડ્સ અને કાંટાળા તાર ગોઠવ્યા હતા. જોકે, આંદોલનકારીઓએ કાંટાળા તાર ઊંચકીને રસ્તો સાફ કરી દીધો હતો. ત્યારબાદ સેંકડો વિદ્યાર્થીઓ વિધાનસભા પરિસરમાં પ્રવેશી ગયા હતા.
કેટલાક વિદ્યાર્થીઓ રસ્તા પર જ સૂઈ ગયા હતા અને સરકાર વિરુદ્ધ સૂત્રોચ્ચાર કરતા જોવા મળ્યા હતા. પરિસ્થિતિ વણસતા વિધાનસભા સંકુલની સુરક્ષા વધુ કડક કરી દેવામાં આવી હતી.
ટીયર ગેસ અને લાઠીચાર્જ બાદ પણ વિદ્યાર્થીઓ અડગ
વિદ્યાર્થીઓને વિધાનસભા તરફ આગળ વધતા અટકાવવા પોલીસે ટીયર ગેસના સેલ છોડ્યા હતા. લાઠીચાર્જ અને વોટર કેનનની કાર્યવાહી પણ કરવામાં આવી હોવાના અહેવાલ છે. પોલીસ કાર્યવાહી બાદ સ્થળ પર નાસભાગ જેવી સ્થિતિ સર્જાઈ હતી, પરંતુ વિદ્યાર્થીઓ ફરી એકઠા થઈને વિરોધ કરતા રહ્યા હતા.
વિદ્યાર્થીઓની સંખ્યા મોટી હોવાથી સ્થિતિને કાબૂમાં લેવા માટે ઝારખંડના અન્ય જિલ્લાઓમાંથી પણ પોલીસ ફોર્સને રાંચી પહોંચવાનો આદેશ આપવામાં આવ્યો હતો.
પોલીસની વિદ્યાર્થીઓને શાંતિ જાળવવાની અપીલ
વિધાનસભાનું સત્ર પૂર્ણ થયા બાદ રાંચી પોલીસે ગેટ નંબર-1 પાસે બેઠેલા વિદ્યાર્થીઓને શાંતિ જાળવવા અને પોતાના ઘરે પરત ફરવાની અપીલ કરી હતી. પોલીસ દ્વારા વિદ્યાર્થીઓને શાંતિપૂર્ણ રીતે વિરોધ કરવા અને કાયદો-વ્યવસ્થા જાળવવામાં સહયોગ આપવા પણ અપીલ કરવામાં આવી હતી.
વિદ્યાર્થીઓની મુખ્ય માંગણીઓ
વિદ્યાર્થી સંગઠનો દ્વારા વિવિધ પરીક્ષાઓમાં ગેરરીતિના આક્ષેપોને લઈને અનેક માંગણીઓ કરવામાં આવી રહી છે.
JSSC-CGL પરીક્ષાની CBI તપાસ કરવામાં આવે.
કથિત ગેરરીતિને કારણે JSSC-CGL પરીક્ષા રદ કરવામાં આવે.
14મી JPSC અને ACF પરીક્ષા રદ કરવામાં આવે.
પરીક્ષા વ્યવસ્થામાં મોટા પાયે સુધારા કરવામાં આવે.
ભવિષ્યમાં પેપર લીક અને ગેરરીતિ અટકાવવા કડક વ્યવસ્થા કરવામાં આવે.
સરકારી ભરતી માટે નિયમિત અને સ્પષ્ટ રિક્રુટમેન્ટ કેલેન્ડર લાગુ કરવામાં આવે.
JPSC કેસમાં પૂર્વ અધ્યક્ષની ધરપકડ
આંદોલન વચ્ચે JPSC સિવિલ સેવા પરીક્ષામાં કથિત ગેરરીતિના કેસમાં ઝારખંડ CID દ્વારા JPSCના પૂર્વ અધ્યક્ષ અને રાજ્યના પૂર્વ મુખ્ય સચિવ L. Khiangteની ધરપકડ કરવામાં આવી છે. તપાસ દરમિયાન અનેક રાઉન્ડની પૂછપરછ બાદ આ કાર્યવાહી કરવામાં આવી હોવાનું સામે આવ્યું છે.
પોલીસ કાર્યવાહી વચ્ચે વિદ્યાર્થીઓએ રાષ્ટ્રગાન ગાયું
લાઠીચાર્જ અને વોટર કેનનની કાર્યવાહી વચ્ચે પણ વિદ્યાર્થીઓએ સ્થળ છોડ્યું નહોતું. વિરોધ દરમિયાન વિદ્યાર્થીઓ એકઠા થઈને રાષ્ટ્રગાન ગાતા જોવા મળ્યા હતા. ઘટનાના વીડિયો અને તસવીરો સોશિયલ મીડિયા પર ચર્ચામાં આવ્યા છે.
ભાજપના નેતાઓની પણ અટકાયત
વિદ્યાર્થી આંદોલન વચ્ચે ભાજપના નેતાઓએ પણ ધરણાં યોજ્યા હતા. પોલીસે ભાજપના પ્રદેશ પ્રમુખ આદિત્ય સાહૂ સહિત કેટલાક નેતાઓની અટકાયત કરી હતી. રાંચીના SP દ્વારા પોલીસકર્મીઓને ધીરજ જાળવવા અને સ્થિતિ વધુ ન વણસે તે માટે સૂચના આપવામાં આવી હતી.
સરકારનો દાવો- મોટાભાગની માંગણીઓ સ્વીકારાઈ
ઝારખંડ સરકારના મંત્રી યોગેન્દ્ર પ્રસાદે આરોપ લગાવ્યો કે ભાજપ વિદ્યાર્થીઓના આંદોલનને રાજકીય રંગ આપીને તેને હાઇજેક કરવાનો પ્રયાસ કરી રહી છે.
બીજી તરફ મંત્રી સુદિવ્ય સોનુએ જણાવ્યું હતું કે સરકારે હાઈલેવલ કમિટી બનાવી છે અને વિદ્યાર્થીઓ સાથે સંવાદ ચાલી રહ્યો છે. સરકારનો દાવો છે કે વિદ્યાર્થીઓની મોટાભાગની માંગણીઓ સ્વીકારી લેવામાં આવી છે.
CBI તપાસ મુદ્દે સરકાર અને વિદ્યાર્થીઓ વચ્ચે મતભેદ
વિદ્યાર્થીઓની મુખ્ય માંગણીઓમાં CBI તપાસનો મુદ્દો હજુ પણ મહત્વનો છે. ભાજપના પ્રદેશ પ્રમુખ આદિત્ય સાહૂએ સરકારને સવાલ કર્યો કે જો વિદ્યાર્થીઓ સમગ્ર મામલાની CBI તપાસની માંગ કરી રહ્યા છે તો સરકારને તેમાં વાંધો શા માટે છે.
રાંચીમાં વિદ્યાર્થીઓના ઉગ્ર વિરોધ, પોલીસ કાર્યવાહી અને રાજકીય નિવેદનો વચ્ચે હવે સરકાર વિદ્યાર્થીઓ સાથે કેવી રીતે સમાધાન કરે છે અને CBI તપાસ અંગે શું નિર્ણય લે છે તેના પર સૌની નજર છે.
