BREAKING : નાસીરનગર ડિમોલિશન વિવાદ બાદ સુરત મ્યુનિસિપલ કમિશનરની બદલી, એમ. નાગરાજનને ગાંધીનગર મોકલાયા
BREAKING : નાસીરનગરમાં થયેલી ડિમોલિશન કાર્યવાહી અંગે ઊભા થયેલા વિવાદ અને ગુજરાત હાઈકોર્ટની ટકોર બાદ રાજ્ય સરકારે વહીવટી સ્તરે મહત્વપૂર્ણ ફેરફાર કર્યો છે. સામાન્ય વહીવટ વિભાગ દ્વારા 11 ઓગસ્ટ, 2026ના રોજ સુરત મ્યુનિસિપલ કમિશનર એમ. નાગરાજનની તાત્કાલિક અસરથી બદલી કરવાનો નિર્ણય લેવામાં આવ્યો છે.
BREAKING : સરકારી આદેશ મુજબ એમ. નાગરાજન (IAS: 2009)ને સુરત મ્યુનિસિપલ કમિશનરના પદ પરથી હટાવી ગાંધીનગર ખાતે ‘સમગ્ર શિક્ષા અભિયાન’ના સ્ટેટ પ્રોજેક્ટ ડિરેક્ટર તરીકે નવી જવાબદારી સોંપવામાં આવી છે.
BREAKING : નાસીરનગર ડિમોલિશન મુદ્દે હાઈકોર્ટની ટકોર બાદ નિર્ણય
સુરતના નાસીરનગર વિસ્તારમાં ડિમોલિશન કાર્યવાહી દરમિયાન પૂર્વ નોટિસ સહિતની પ્રક્રિયા અંગે સવાલો ઉઠ્યા હતા. આ મામલો ગુજરાત હાઈકોર્ટ સુધી પહોંચ્યો હતો. સુનાવણી દરમિયાન હાઈકોર્ટે કાર્યવાહી અને જવાબદારીને લઈને કડક વલણ અપનાવ્યું હતું.
આ સમગ્ર ઘટનાક્રમ બાદ રાજ્ય સરકાર દ્વારા સુરત મહાનગરપાલિકાના વહીવટી માળખામાં આ મહત્વપૂર્ણ ફેરફાર કરવામાં આવ્યો છે.
BREAKING : તેજસ પરમારને સુરત મ્યુનિસિપલ કમિશનરનો વધારાનો ચાર્જ
એમ. નાગરાજનની બદલી બાદ સુરતના જિલ્લા કલેક્ટર તેજસ દિલીપભાઈ પરમાર (IAS: 2016) ને સુરત મ્યુનિસિપલ કમિશનર તરીકેનો વધારાનો હવાલો સોંપવામાં આવ્યો છે.
સરકારી આદેશ મુજબ ગુજરાત પ્રોવિન્શિયલ મ્યુનિસિપલ કોર્પોરેશન (GPMC) એક્ટ, 1949ની કલમ 39 હેઠળ તેજસ પરમારને આ વધારાની જવાબદારી આપવામાં આવી છે.
સમગ્ર શિક્ષા અભિયાનમાં પણ ફેરફાર
વહીવટી બદલાવના ભાગરૂપે ‘સમગ્ર શિક્ષા અભિયાન’ના અગાઉના સ્ટેટ પ્રોજેક્ટ ડિરેક્ટર રંજીથ કુમાર જે. (IAS: 2005)ની પણ બદલી કરવામાં આવી છે. તેમને ગાંધીનગર સ્થિત ગુજરાત ઇલેક્ટ્રિસિટી રેગ્યુલેટરી કમિશન (GERC)ના સેક્રેટરી તરીકે નિયુક્ત કરવામાં આવ્યા છે.
આ રીતે એક જ સરકારી આદેશથી સુરત મહાનગરપાલિકા અને ગાંધીનગર સ્થિત મહત્વપૂર્ણ વહીવટી હોદ્દાઓમાં ફેરફાર કરવામાં આવ્યો છે.