નારી શક્તિ વંદન સંમેલન: આજે વિજ્ઞાન ભવનમાં PM મોદીનું સંબોધન
PM નરેન્દ્ર મોદી આજે નવી દિલ્હીના વિજ્ઞાન ભવન ખાતે ‘નારી શક્તિ વંદન સંમેલન’ને સંબોધિત કરશે. આ સંમેલન મહિલા અનામત અધિનિયમના અમલીકરણની દિશામાં એક મહત્વપૂર્ણ કડી છે.
વડાપ્રધાન નરેન્દ્ર મોદી આજે નવી દિલ્હીના વિજ્ઞાન ભવન ખાતે ‘નારી શક્તિ વંદન સંમેલન’ને સંબોધિત કરશે. આ સંમેલન મહિલા અનામત અધિનિયમના અમલીકરણની દિશામાં એક મહત્વપૂર્ણ કડી છે. આ કાર્યક્રમમાં રાજકારણ ઉપરાંત શિક્ષણ, વિજ્ઞાન, રમતગમત અને સંસ્કૃતિ જેવા વિવિધ ક્ષેત્રોની પ્રતિષ્ઠિત મહિલા હસ્તીઓ એક મંચ પર જોવા મળશે. આ સંમેલનના ત્રણ દિવસ બાદ એટલે કે 16 એપ્રિલના રોજ સંસદનું વિશેષ સત્ર પણ બોલાવવામાં આવ્યું છે, જે મહિલા આરક્ષણના અમલીકરણ માટે સીમાચિહ્નરૂપ સાબિત થશે.
આ આયોજન એટલા માટે ખાસ છે કારણ કે દેશ અત્યારે ‘નારી શક્તિ વંદન અધિનિયમ’ના અમલીકરણની ઉબરો પર ઉભો છે. ઉલ્લેખનીય છે કે સપ્ટેમ્બર ૨૦૨૩માં પસાર થયેલા આ ઐતિહાસિક અધિનિયમ હેઠળ લોકસભા અને રાજ્યની વિધાનસભામાં મહિલાઓ માટે એક તૃતિયાંશ બેઠકો અનામત રાખવાની જોગવાઈ કરવામાં આવી છે. આ સંમેલનનો મુખ્ય ઉદ્દેશ્ય હવે દેશભરમાં આ આરક્ષણને અસરકારક રીતે કેવી રીતે લાગુ કરી શકાય તેના પર કેન્દ્રિત રહેશે. વડાપ્રધાન આ મંચ પરથી મહિલાઓના સશક્તિકરણ માટે સરકારના ભાવિ રોડમેપ વિશે પણ મહત્વની વાતો કરી શકે છે.
વિજ્ઞાન ભવનમાં થનારા આ મહામંથનમાં માત્ર રાજકારણ સાથે જોડાયેલી મહિલાઓ જ નહીં, પરંતુ શિક્ષણ, વિજ્ઞાન, રમતગમત, ઉદ્યોગસાહસિકતા, મીડિયા, સામાજિક કાર્ય અને સંસ્કૃતિ જેવા વિવિધ ક્ષેત્રોમાં પોતાની આગવી ઓળખ ઉભી કરનાર પ્રતિભાઓ પણ એક મંચ પર જોવા મળશે. આ સંમેલન સાચા અર્થમાં મહિલા નેતૃત્વના દરેક સ્તરને ઉજાગર કરશે. પાયાના સ્તરે પંચાયતથી લઈને દેશની સર્વોચ્ચ સંસ્થા સંસદ સુધી મહિલાઓની સક્રિય ભાગીદારી કેવી રીતે વધારી શકાય તે અંગે આ બેઠકમાં ગહન ચર્ચા કરવામાં આવશે.
સૌથી મહત્વની વાત એ છે કે આ સંમેલનના બરાબર ત્રણ દિવસ બાદ એટલે કે ૧૬ એપ્રિલે સંસદનું એક વિશેષ સત્ર પણ બોલાવવામાં આવ્યું છે. આ વિશેષ સત્ર મહિલા અનામત પ્રક્રિયાને વેગ આપવા અને તેના અમલીકરણની દિશામાં અત્યંત નિર્ણાયક માનવામાં આવે છે. સરકારની આ તત્પરતા દર્શાવે છે કે તેઓ મહિલાઓને દેશના વિકાસની મુખ્ય ધારામાં લાવવા માટે કેટલા ગંભીર છે. દેશની અડધી આબાદીને તેમનો હક અપાવવા માટે ચાલી રહેલા આ અભિયાનમાં ૧૩ એપ્રિલનું આ સંમેલન એક નવી ઉર્જા ફૂંકવાનું કામ કરશે.
આ કાર્યક્રમમાં ભાગ લેવા માટે દેશના ખૂણેખૂણેથી મહિલા પ્રતિનિધિઓ દિલ્હી પહોંચી રહી છે. વડાપ્રધાન નરેન્દ્ર મોદીના સંબોધન પર માત્ર દેશની જ નહીં પરંતુ આંતરરાષ્ટ્રીય સમુદાયની પણ નજર રહેશે, કારણ કે ભારત વિશ્વનું સૌથી મોટું લોકશાહી હોવાને નાતે મહિલા નેતૃત્વના ક્ષેત્રમાં એક નવું ઉદાહરણ પૂરું પાડવા જઈ રહ્યું છે. નારી શક્તિના સન્માન અને તેમના અધિકારોના વંદનનો આ અવસર આવનારા દાયકાઓ સુધી ભારતીય રાજનીતિની દિશા બદલનારો સાબિત થઈ શકે છે.