વડોદરાથી એક ચોંકાવનાર સમાચાર આવ્યા છે. અહીં, દરજીપુરા વિસ્તારના એરફોર્સ સ્ટેશન ખાતે એક પત્નીએ તેના સ્કોર્ડન લીડર પતિ સામે મારઝૂડ અને માનસિક ત્રાસ આપવાની ફરિયાદ નોંધાવી છે. સાથે પત્નીએ સ્કોર્ડન લીડર પતિ પર શારિરીક બીમારી છુપાવી લગ્ન કર્યા હોવાનો આરોપ પણ લગાવ્યો છે. આ અંગેની ફરિયાદ હરણી પોલીસ સ્ટેશનમાં નોંધાઈ છે.
વેલેન્ટાઇનના દિવસે જ પરિણીતાને માર માર્યો
ફરિયાદ મુજબ, પરિણીતા મૂળ બિહારના પટનાની રહેવાસી છે અને તેના લગ્ન દિલ્હી ખાતે ઇશાન ડાગર (મૂળ રાજસ્થાન) સાથે વર્ષ 2018માં સમાજના રીતરિવાજ સાથે થયા હતા. ઇશાન ડાગર છેલ્લા સાડા ત્રણ વર્ષથી વડોદરાના દરજીપુરા એરફોર્સ સ્ટેશનમાં સ્કોર્ડન લીડર તરીકે ફરજ બજાવે છે. બંનેને લગ્નજીવનથી કોઈ સંતાન નથી. વેલેન્ટાઇનના દિવસે સાંજે પતિ ઇશાન બહારથી આવ્યો હતો અને પરિણીતા સાથે ઝઘડો કર્યો હતો. દરમિયાન ઇશાને પરિણીતાને મોઢાના ભાગે બે મુક્કા પણ માર્યા હતા. આથી પરિણીતાએ પહેલા એરફોર્સ સ્ટેશન અને ત્યાર બાદ પોલીસ કંટ્રોલમાં આ અંગેની જાણ કરી હતી. જોકે પરિણીતાએ માત્ર અરજી જ કરી હતી.
શારિરીક બીમારી છૂપાવ્યા હોવાનો આરોપ
પરંતુ, પતિ ઇશાનની હેરાનગતિ યથાવત રહેતા આખરે કંટાળીને પરિણીતાએ હરણી પોલોસી સ્ટેશનમાં ફરિયાદ નોંધાવી છે. પરિણીતાએ ફરિયાદમાં આરોપ લગાવ્યો કે, ઇશાન પહેલા પણ તેણી સાથે મારઝૂડ કરતો હતો, જેથી કંટાળીને તે તેના પિયર બિહાર જતી રહી હતી. જોકે, દોઢ વર્ષ બાદ સમજૂતી થતા પતિના ઘરે વડોદરા આવી હતી. પરિણીતાએ એવો પણ આરોપ લગાવ્યો કે, પતિ લગ્ન પહેલાથી જ પિતા બનવા સક્ષમ ન હતા છતાં તેમણે આ વાત છૂપાવીને રાખી હતી. તેમ જ સારવાર પણ કરાવી નથી. પરિણીતાની ફરિયાદ બાદ હરણી પોલીસે કાયદેસરની કાર્યવાહી હાથ ધરી છે.