₹2,000થી વધુના UPI વ્યવહારો પર 0.40% MDR: ગ્રાહકો પાસેથી નહીં, વેપારીઓ પાસેથી વસૂલાશે
₹2,000થી વધુના કેટલાક UPI મર્ચન્ટ ટ્રાન્ઝેક્શન પર 15 ઓક્ટોબરથી 0.40 ટકા મર્ચન્ટ ડિસ્કાઉન્ટ રેટ (MDR) લાગુ કરવાની જાહેરાતને લઈને ચર્ચા તેજ બની છે. જોકે સરકારે સ્પષ્ટ કર્યું છે કે આ ચાર્જ ગ્રાહક પાસેથી નહીં, પરંતુ લાગુ પડતા વેપારી પાસેથી વસૂલવામાં આવશે.
નવા નિયમ મુજબ ₹2,000 સુધીના UPI વ્યવહારો પર કોઈ લેવી ચાર્જ નહીં રહે. જ્યારે ₹2,000થી વધુના પાત્ર મર્ચન્ટ ટ્રાન્ઝેક્શન પર 0.40 ટકા MDR લાગુ થશે. આ ચાર્જની મહત્તમ મર્યાદા પ્રતિ ટ્રાન્ઝેક્શન ₹300 નક્કી કરવામાં આવી છે.
મહિને UPI મારફતે રૂ. 1 લાખ સુધીનું પેમેન્ટ મેળવનારા પાત્ર નાના વેપારીઓને MDRમાંથી મુક્તિ આપવામાં આવી છે. જ્યારે રેલવે ટિકિટ, પેટ્રોલ પંપ, વીજળી, PNG, પાણી, વીમા અને ટેલિફોન જેવી આવશ્યક સેવાઓ માટે ₹5નો ફ્લેટ MDR નક્કી કરવામાં આવ્યો છે.
સરકારના જણાવ્યા મુજબ આ વ્યવસ્થા P2M (Person-to-Merchant) વ્યવહારો માટે છે, જ્યારે વ્યક્તિથી વ્યક્તિ વચ્ચેના P2P UPI ટ્રાન્ઝેક્શન પર કોઈ ચાર્જ લાગશે નહીં.
આ નિર્ણયને લઈને રાજકીય ચર્ચા પણ શરૂ થઈ છે. કોંગ્રેસ સહિત વિપક્ષી પક્ષોએ ચિંતા વ્યક્ત કરી છે કે MDRનો બોજ અંતે ગ્રાહકો સુધી પહોંચી શકે છે. બીજી તરફ ભાજપે આ દાવાને ફગાવીને સ્પષ્ટ કર્યું છે કે UPI ચાર્જ ગ્રાહકો પાસેથી વસૂલવાનો નથી.
આ નિર્ણય બાદ વેપારીઓમાં પણ UPI પેમેન્ટની કિંમત અને MDRનો વ્યવસાય પર પડનારા સંભવિત પ્રભાવ અંગે ચર્ચા શરૂ થઈ છે.
