ST BUSES CLOSED : લખપતમાં નદીના પાણી ઓસર્યા છતાં બસો બંધ રહેતા લોકોને ખાનગી વાહનોનો સહારો લેવો પડે છે.
લખપત તાલુકામાં થોડા દિવસો પહેલા પડેલા વરસાદને કારણે ઘડુલીથી પાનધ્રો ધોરીમાર્ગ પર આવેલી કાળી નદીમાં પાણી વહી નીકળ્યું હતું. આ કારણે વાહન વ્યવહાર બંધ થઈ ગયો હતો. હવે નદીનું પાણી ઓસરી ગયું છે અને ખાનગી વાહનોની અવરજવર શરૂ થઈ ગઈ છે.
પરંતુ એસટી બસો હજુ પણ વૈકલ્પિક માર્ગેથી ચાલી રહી છે. નારાયણ સરોવર જતી બસો દયાપરથી વાયા સુભાષપર થઈને પાનધ્રો જઈ રહી છે. આના કારણે વિરાણી નાની, ઘડૂલી, ધારેશી, સિયોત, ગુનેરી, લખપત, ઉમરસર, મુધાન, સાંયરા, અટડા, ખટીયા અને લાખાપર સહિતના ગામોના મુસાફરોને દયાપર ઉતરવું પડે છે. તેમને ખાનગી વાહનોનો સહારો લેવો પડે છે.
લખપત તાલુકા પંચાયત પ્રમુખ દયાબા જશુભા જાડેજાએ ઉંમરસર જીએમડીસી પ્રોજેક્ટ મેનેજરને લેખિત રજૂઆત કરી છે. તેમણે જણાવ્યું કે જીએમડીસી હસ્તકના ઘડુલીથી પાનધ્રો માર્ગની હાલત ખૂબ ખરાબ છે. માર્ગના નવીનીકરણ માટે અનેક વખત મૌખિક અને લેખિત રજૂઆતો કરવામાં આવી છે. છતાં કોઈ કાર્યવાહી થઈ નથી. તેમણે ચેતવણી આપી છે કે જો માર્ગનું સમારકામ નહીં થાય તો જીએમડીસી સ્ટાફના વાહનો અને સાધનો રોકવામાં આવશે.