EX SERVICEMENS AGITATION : વિફરેલા પૂર્વ આર્મી જવાનો સચિવાલય જવા રવાના,ગાંધીનગરના પ્રવેશ દ્વારે ચેકિંગ હાથ ધરી અટકાયતો શરૂ
EX SERVICEMENS AGITATION : પૂર્વ સૈનિકો દ્વારા પડતર માંગણીઓને લઈ ચાલી રહેલા ‘ઓપરેશન અનામત’ આંદોલન આજે(19 ઓગસ્ટ, 2025) 23મો દિવસ છે. ગાંધીનગરના સેક્ટર-6 સત્યાગ્રહ છાવણી ખાતે એકઠા થયેલા પૂર્વ સૈનિકો અને ‘ગુજરાત પૂર્વ સૈનિક સંગઠન’ દ્વારા સૈનિક અધિકારી મહારેલીનું આહવાન કરાયું હતું, જેમાં રેલી પહેલાં પૂર્વ સૈનિકોની બોચી પકડીને પોલીસે અટકાયત કરી છે. આ આંદોલનમાં સવારે 50થી વધુ પૂર્વ સૈનિકોની અટકાયત કરી હતી. DySPએ કહ્યું હતું કે મહારેલીની પરમિશન અપાઈ નથી.
ગાંધીનગરમાં પોલીસે અટકાયત કરતા તેમને છોડાવવા માટે બપોર પછી અઢી વાગ્યા આસપાસ આક્રોશમાં આવેલા 1000-1500 પૂર્વ આર્મી જવાનો અમદાવાદ આવ્યા હતા. એરપોર્ટ સર્કલથી ઇન્દિરાબ્રિજના રસ્તા રોકી લીધા હતા. જેને પગલે ક્રાઈમ બ્રાન્ચના જેસીપી, સેક્ટર 2, ડીસીપી,એસીપી સહિતનો મોટો કાફલો પહોંચ્યો હતો.
EX SERVICEMENS AGITATION : તેમજ અટકાયત દરમિયાન ઘર્ષણ થયા બાદ પોલીસે તમામ અટકાયતીઓને મુક્ત કરવાની ફરજ પડી હતી. ત્યાર બાદ તેમને સમજાવીને રસ્તો ક્લિય કરાવ્યો હતો. જો કેપૂર્વ સૈનિકોએ માંગ કરી છે કે ગાંધીનગર ખાતેથી જે જે પૂર્વ સૈનિકોની અટકાયત કરી હતી, તેમને તાત્કાલિક મુક્ત કરવામાં આવે.
EX SERVICEMENS AGITATION : પોલીસે મામલો થાળે પાડ્યા બાદ પૂર્વ સૈનિકો આર્મી હોસ્પિટલમાં જમવા માટે ગયા હતા. જ્યાંથી તેઓ ફરીથી બહાર આવ્યા અને પોત પોતાના વાહનોમાં ગાંધીનગર સચિવાલય જવા રવાના થયા હતા. ત્યાર બાદ એરપોર્ટ સર્કલ ખાતે આવેલી આર્મી હોસ્પિટલના ગેટ પર લોક મારી દેવામાં આવ્યું હતું. તો બીજી તરફ પૂર્વ આર્મી જવાનો ગાંધીનગર તરફ આવતા હોવાની જાણ થતા પોલીસ કાફલો તૈનાત કરી દેવામાં આવ્યો છે. ગાંધીનગરના પ્રવેશ દ્વારે અને બસોમાં સઘન પોલીસ ચેકિંગ શરૂ કર્યું છે. તેની સાથે સાથે અટકાયત પણ કરવામાં આવી રહી છે.
પૂર્વ આર્મી જવાનોના આ ચક્કાજામને પગલે અમદાવાદ એરપોર્ટ દ્વારા પેસેન્જર્સ માટે એડવાઇઝરી જાહેર કરવામાં આવી છે. જેમાં કહેવામાં આવ્યું છે કે, સમયસર એરપોર્ટ પહોંચવા માટે વહેલાસર નીકળી જવું.
EX SERVICEMENS AGITATION : ગુજરાત પૂર્વ સૈનિક સંગઠનના પ્રમુખ જીતેન્દ્ર નિમાવતની મુક્તિની પણ તેઓ માંગ કરી રહ્યા છે. તેમનો આક્ષેપ છે કે શાંતિપૂર્ણ રીતે આંદોલન કરી રહેલા પૂર્વ સૈનિકોને પોલીસે ડિટેઈન કર્યા છે. જ્યાં સુધી તેમના નેતાઓને મુક્ત કરવામાં નહીં આવે ત્યાં સુધી આ આંદોલન ચાલુ રહેશે. તેમજ ચીમકી ઉચ્ચારી છે કે, પૂર્વ સૈનિક સંગઠનના પ્રમુખ જીતેન્દ્ર નિમાવતને છોડવામાં ન આવે ત્યાં સુધી આંદોલન કરવામાં આવશે. તેમજ તેને તાત્કાલિક મુક્ત કરાવવા માટે અલ્ટીમેટમ આપ્યું હતું.
શરૂઆતમાં એરપોર્ટ સર્કલ પર પૂર્વ સૈનિકોએ ચક્કાજામ કરી વિરોધ નોંધાવ્યો હતો. 200થી પણ વધુ પૂર્વ સૈનિકોએ રસ્તા પર બેસીને ‘ભારત માતા કી જય’ અને ‘વંદે માતરમ’ના નારા લગાવ્યા હતા. આ ચક્કાજામના કારણે એરપોર્ટ પર આવતા-જતા મુસાફરોને ભારે હાલાકીનો સામનો કરવો પડ્યો હતો અને બે કિલોમીટર સુધીનો લાંબો ટ્રાફિક જામ થયો હતો.
EX SERVICEMENS AGITATION : પૂર્વ આર્મી જવાનોનો રોષ જોઇને પોલીસે મામલો થાળે પાડવાના પ્રયાસો શરૂ કર્યા અને પૂર્વ આર્મી જવાનોને સમજાવીને ઊભા કર્યા હતા. ત્યાર બાદ ઘણાં પૂર્વ આર્મી જવાનોની અટકાયત કરવામાં આવી હતી. પૂર્વ આર્મી જવાનો જબરજસ્તીથી પોલીસની ગાડીમાં ઘૂસી અટકાયત કરેલા લોકોને બહાર કાઢી લાવ્યા હતા. આ સમયે ઘર્ષણ પણ થયું હતું. જો કે પોલીસે નમતું જોખીને ક્રાઈમ જેસીપી દ્વારા અટકાયત કરાયેલા પૂર્વ આર્મી જવાનોને ગાડીમાં જાતે જ બહાર કાઢવા પડ્યા હતા.
ત્યાર બાદ પોલીસે પૂર્વ સૈનિકો સાથે વાતચીત કરી અને સમજાવીને પરત વાળ્યા હતા. તેમજ પોલીસે અટકાયત કરેલા લોકોને છોડવા પડ્યા હતા. આમ પૂર્વ સૈનિકો સામે પોલીસ પણ નરમ પડી હતી. સમજાવીને રસ્તો ખોલવા સમજાવતા લોકો રસ્તો ખોલીને રસ્તાની બાજુમાં ઊભા રહ્યા છે.
EX SERVICEMENS AGITATION : પૂર્વ સૈનિક સંગઠનના પ્રમુખ જીતેન્દ્ર નિમાવતે કહ્યું કે, મને ડીટેઇન કરી લેવામાં આવ્યો છે. એરપોર્ટ સર્કલે અમારા જવાનો એકઠા થયા છે. અમારું આંદોલન ચાલુ જ રહેવાનું છે હવે એક મુદ્દો નહીં અમારા જેટલા પણ પેન્ડિંગ મુદ્દા(માંગણીઓ) છે એ બધાને લઈને અમે આંદોલન કરીશું. અત્યાર સુધીમાં 500 જેટલા પૂર્વ સૈનિકો અને વિરંગાને ડિટેઇન કરવામાં આવ્યા છે.
મહારેલી યોજાઈ એ પહેલાં જ આજે(19 ઓગસ્ટે) વહેલી સવારથી જ સત્યાગ્રહ છાવણી પોલીસ બંદોબસ્તમાં ફેરવાયું છે. શહેરના પ્રવેશ માર્ગો ઉપર ચુસ્ત નાકાબંધી કરી દેવાય છે તેમજ તમામ વાહનોને ચેક કરીને જ શહેરમાં પ્રવેશ આપવામાં આવી રહ્યો છે.
EX SERVICEMENS AGITATION : અત્યારસુધી 50થી વધુ માજી સૈનિકોને ડિટેઇન કરી લેવામાં આવ્યા છે. અલગ અલગ નાકા પોઇન્ટ પરથી માજી સૈનિકોને ડિટેઇન કરવાની કાર્યવાહી હાથ ધરવામાં આવી છે. મહત્ત્વનું છે કે પોલીસ દ્વારા માજી સૈનિકોને મહારેલી માટેની મંજૂરી આપવામાં આવી નથી. એના પગલે પોલીસ કાયદાકીય રીતે માજી સૈનિકોને ડિટેઇન કરવાની કાર્યવાહી હાથ ધરી છે.
DySP ડી. ટી. ગોહિલએ જણાવ્યું હતું કે માજી સૈનિકોને મહારેલીની પરમિશન આપવામાં આવી નથી. એના કારણે તેમને ડિટેઇન કરવાની કામગીરી ચાલી રહી છે. જિલ્લાના પ્રવેશદ્વાર પર પોલીસ-બંદોબસ્ત ગોઠવી દેવામાં આવ્યો છે. મહારેલીના પગલે અધિકારીઓ સહિત 400 જેટલા પોલીસ જવાનોને અલગ અલગ સ્થળોએ ફરજ સોંપવામાં આવી છે.
EX SERVICEMENS AGITATION : સચિવાલય માર્ગો પર સઘન સુરક્ષા વ્યવસ્થા ગોઠવવામાં આવી છે. સચિવાલય તરફ આવતા તમામ રસ્તાઓ પર ચુસ્ત પોલીસ બંદોબસ્ત જોવા મળી રહ્યો છે અને વાહનોની અવરજવરને પ્રતિબંધિત કરવામાં આવી છે. દરેક વાહનચાલકનું આઈકાર્ડ ચેકિંગ ફરજિયાત કરવામાં આવ્યું છે, અને આઈકાર્ડ વગર કોઈને પણ પ્રવેશ આપવામાં આવી રહ્યો નથી.