વલસાડ : વાપી GIDCમાં 3rd ફેઝમાં આવેલી HRD કેમિકલ એન્ડ ટ્રેડિંગ કંપનીમાં ભીષણ આગ લાગતા આસપાસના વિસ્તારમાં અફરાતફરીનો માહોલ સર્જાયો હતો. કંપનીના ગોડાઉનમાં રહેલા સોલ્વન્ટના ડ્રમમાં અચાનક આગ લાગતા 16 ફાયર ટેન્ડરને ઘટનાસ્થળે પહોંચ્યા હતા. આ આગમાં કંપની ઉપરાંત કંપની બહાર પાર્ક વાહનો પણ આગના લપેટામાં આવી ગયા છે.
આગ પર કાબૂ મેળવવા માટે વાપી નોટિફાઇડ, વાપી નગરપાલિકા ઉપરાંત દમણ અને સેલવાસ અને વલસાડથી ફાયરના વોટર બ્રાઉઝરને ફોમ સાથે મંગાવવામાં આવ્યા હતા. આ આગ પર કાબૂ મેળવવા માટે પાણી સાથે ફોમનો મારો ચલાવવામાં આવી રહ્યો છે. જો કે આગની વિકરાળ જ્વાળાને કારણે સોલ્વન્ટમાં લાગી હોવાથી અંદાજીત 4 કલાક બાદ પણ આગ પર કાબૂ મેળવી શકાયો નથી.
ઉલ્લેખનીય છે કે, આગની ઘટનામાં કંપની પરિસરમાં પાર્ક વાહનો પણ બળીને ખાખ થયા છે. કોઈ જાનહાનિ નોંધાઇ નથી, પરંતુ સાવચેતીના ભાગરૂપે આસપાસના વિસ્તારને કોર્ડન કરવામાં આવ્યો છે. હાલ આગ પર કાબૂ મેળવવા ફાયર વિભાગ દ્વારા પ્રયાસો ચાલી રહ્યા છે.