કુમળા ફૂલ જેવી બાળકીને મંદિરના ઓટલે ત્યજી દેવાઈ
આસપાસના લોકોએ બાળકીને દૂધ પીવડાવી કોઈ લઈ જશે તેમ સમજી સાચવી રાખી
હાડ થીજવતી ઠંડીમાં ગોદડીમાં વિટાળેલી હાલતમાં કોઈ બાળકીને મુકીને જતું રહ્યું હતું
મંદિરના ઓટલેથી બાળકીના રડવાનો અવાજ આવતાં આસપાસના લોકોએ તેને શાંત કરી અને પોલીસને જાણ કરી
‘મા તે મા બીજા બધા વગડાના વા’, ‘ગોળ વિના સુનો કંસાર, મા વિના સુનો સંસાર’ જેવી માતૃ પ્રેમ માટે આવી અનેક કહેવતો છે. પરંતુ સમાજમાં માતૃપ્રેમ જાણે કે મરી પરવાર્યો હોય એવો કિસ્સો અમદાવાદ શહેરના મણિનગર વિસ્તારમાં બન્યો છે. હાડ થીજવતી ઠંડીમાં વહેલી સવારે જોગણી માતાના મંદિરના ઓટલે ત્યજી દીધેલી હાલતમાં એક રડતી બાળકી મળી આવી હતી. આસપાસના લોકોએ દરગાહમાં લઈ જઈ આ બાળકીને દૂધ પીવડાવી કોઈ લઈ જશે તેમ સમજી સાચવી રાખી હતી. આ મુદ્દે મણિનગર પોલીસે ગુનો નોંધી વધુ તપાસ હાથ ધરી છે.
ગોદડીમાં ઢાંકેલું બાળક હાડ થીજવતી ઠંડીમાં રડતું હતું
શહેરના મણિનગર વિસ્તારમાં મચ્છી પીરની દરગાહ પાસે રહેતા મહેમૂદભાઈ શેખ કાગડાપીઠમાં આવેલી એક કાપડની દુકાનમાં નોકરી કરી પોતાના પરિવારનું ગુજરાન ચલાવે છે. રવિવારે સવારે તેઓ સુતા હતા ત્યારે દરગાહ પાસે ફૂટપાથ પર રહેતા દિવાળી બેને આવી તેમને બૂમો પાડી જણાવ્યું કે, દરગાહની બાજુમાં આવેલા જોગણી માતા અને હડકવાઈ માતાના મંદિરના ઓટલા પર બાળકના રડવાનો અવાજ આવે છે. મહેમૂદભાઈના પરિવારજનોએ જઈને જોયું તો એક એક ગોદડીમાં ઢાંકેલું બાળક હાડ થીજવતી ઠંડીમાં રડતું હતું.
લાંબા સમય સુધી બાળકીને લેવા કોઈ ના આવ્યું
ગોદડી હટાવીને જોયું તો તેમાં 10થી 12 દિવસની તાજી જન્મેલી બાળકી હતી. આ બાળકીને ઉઠાવીને મહેમૂદભાઈ સહિતના લોકો દરગાહમાં લઇ ગયા હતા અને ત્યાં બાળકીને દૂધ પીવડાવી શાંત કરી હતી. મહેમૂદભાઈ સહિતના લોકોને થયું કે કોઈ બાળકી મૂકી આસપાસમાં ગયું હશે. જોકે, લાંબા સમય સુધી બાળકીને લેવા માટે કોઈ ન આવતા તેમણે મણિનગર પોલીસને જાણ કરી હતી. પોલીસે આ મુદ્દે ગુનો નોંધીને વધુ તપાસ હાથ ધરી છે.