શ્રદ્ધા: મારી દશા અને દિશા બદલનારી દશામા
લેખિકા: માલા રાવલ
આ વાર્તા ચરોતરના મીનાવાડા ગામની છે. ત્યાં એક ખેડૂત પરિવારમાં શારદાબા નામની અત્યંત ધાર્મિક દીકરી હતી. તેને દશામાનું વ્રત કરવાની ખૂબ ઈચ્છા હતી.
એક દિવસ માતા-પિતાએ તેને ભેંસો ચરાવવા મોકલી. ભૂખ્યા પેટે વ્રત હોવાથી તે બેભાન થઈ ઝાડ નીચે ઢળી પડી. જ્યારે તેને ભાન આવ્યું ત્યારે તેણે જોયું કે તેની ભેંસ પાણીમાં ફસાઈ ગઈ છે. તેણે સાચા દિલથી દશામાને પ્રાર્થના કરી. દશામા ડોશીના રૂપમાં પ્રગટ થયા. શારદાબાએ તેમને ઓળખી લીધા.
માતાજી પ્રસન્ન થઈને બોલ્યાં, “તારી ભક્તિથી હું પ્રસન્ન છું. માગ, તારે શું જોઈએ છે?”
શારદાબાએ કહ્યું, “મને તમારું ત્રિશૂળ અને ચૂંદડી આપો, જેથી હું દુઃખિયાઓના દુઃખ દૂર કરી શકું.”
માતાજીએ તેને ત્રિશૂળ અને ચૂંદડી આપ્યાં. ત્યારથી શારદાબાના હાથમાંથી કંકુ ખરવા લાગ્યું. તે કંકુનું તિલક કરવાથી લોકોનાં દુઃખ, રોગ અને પીડા દૂર થવા લાગ્યાં.
આજે પણ મીનાવાડામાં શારદામા અને દશામાનું મંદિર આવેલું છે, જ્યાં શ્રાવણ મહિનામાં ૧૦ દિવસ સુધી ભવ્ય મેળો ભરાય છે.
દશામા વ્રતની સંપૂર્ણ વિધિ
દશામાને મોમાઈ માતા તરીકે પણ ઓળખવામાં આવે છે. આ વ્રત કરવાથી જીવનની ખરાબ દશા દૂર થાય છે.
૧. વ્રત ક્યારે કરવું?
આ વ્રત અષાઢ વદ અમાસના જાગરણથી શરૂ થાય છે અને સતત ૧૦ દિવસ સુધી ચાલે છે.
૨. જરૂરી સામગ્રી:
લાલ કપડું, ઘઉં, તાંબાનો કળશ, નાગરવેલનાં ૫ પાન, નાળિયેર, કંકુ, સુતરનો દોરો અને દશામાનો ફોટો.
૩. પૂજા વિધિ:
• બાજઠ પર લાલ કપડું પાથરી ઘઉંની ઢગલી પર દશામાની મૂર્તિ સ્થાપિત કરો.
• તાંબાના કળશ પર નાળિયેર સ્થાપિત કરો.
• સુતરના ૧૦ તાંતણાવાળા દોરામાં કંકુ લગાવી ૧૦ ગાંઠો વાળી હાથમાં બાંધો.
• ૧૦ દિવસ સુધી અખંડ દીવો પ્રગટાવો અને દરરોજ દશામાની કથા સાંભળો.
• ૧૧મા દિવસે મૂર્તિનું વિસર્જન કરો.
આ વ્રત સતત ૫ વર્ષ સુધી કરવાથી પૂર્ણ માનવામાં આવે છે.
મારો અનુભવ: શ્રદ્ધાએ કેન્સરને હરાવ્યું
આ કથા વાંચીને મેં પણ દશામાના વ્રતનો સંકલ્પ લીધો. માતાજીની કૃપાથી મારું કેન્સર મટી ગયું અને હું એક જ વર્ષમાં ફરી હરતી-ફરતી થઈ ગઈ. દશામા ખરેખર હાજરાહજૂર અને કરુણામય છે.
