કોંગ્રેસ પાર્ટીની ભારત જોડો યાત્રાને એક મહિનો પૂરો થઈ ચુક્યો છે. 7 સપ્ટેમ્બરે કન્યાકુમારીથી શરૂ થયેલી આ યાત્રા 31મા દિવસમાં પહોંચી ગઈ છે. શનિવારે કોંગ્રેસ નેતા રાહુલ ગાંધીએ કર્ણાટકના તુમાકુરુના માયાસન્દ્રાથી પોતાની યાત્રાની શરૂઆત કરી હતી. આ દરમિયાન તેમની સાથે સેંકડો કાર્યકરોની ભીડ દેખાઈ. જણાવી દઈએ કે, આ પહેલા શુક્રવારે ઈન્દિરા લંકેશ અને કવિતા લંકેશે પણ ભારત જોડો યાત્રામાં ભાગ લીધો હતો. આ બંને મહિલાઓ પત્રકાર અને સામાજિક કાર્યકર્તા ગૌરી લંકેશની માતા અને બહેન છે. ગૌરીની હત્યા 2017માં થઈ હતી.
આ પહેલા કોંગ્રેસ અધ્યક્ષ સોનિયા ગાંધી ગુરુવારે ‘ભારત જોડો યાત્રા’માં ભાગ લેવા માટે કર્ણાટકમાં હતા. તેઓ પુત્ર રાહુલ ગાંધી સાથે લગભગ એક કિલોમીટર સુધી ચાલ્યા હતા. આ દરમિયાન માતા અને પુત્રના પ્રેમની ઘણી ઝલક જોવા મળી હતી. પદયાત્રા દરમિયાન મા-દીકરાના સ્નેહ સાથે જોડાયેલી અનેક તસવીરો કોંગ્રેસના નેતાઓએ સોશિયલ મીડિયા પર શેર કરી છે. દરમિયાન પાર્ટીના મહાસચિવ જયરામ રમેશે કહ્યું હતું કે, સોનિયા ગાંધીજીના આ યાત્રામાં જોડાવાથી આજે લોકોનો ઉત્સાહ વધ્યો છે. કર્ણાટકમાં જનતા તરફથી ખૂબ જ સકારાત્મક પ્રતિસાદ મળી રહ્યો છે.
ગુરુવારે કોંગ્રેસના પ્રદેશ પ્રમુખ ડીકે શિવકુમારે કહ્યું કે, “વિજયાદશમી પછી કર્ણાટકમાં જીત થશે. અમને ગર્વ છે કે સોનિયા ગાંધી કર્ણાટકના રસ્તાઓ પર યાત્રામાં જોડાયા હતા. તેમણે કહ્યું કે અમે રાજ્યમાં સત્તામાં આવીશું અને ભાજપની દુકાન બંધ થવાના માર્ગે છે.”
બે દિવસ પહેલા ભારત જોડો યાત્રામાં જયારે 75 વર્ષીય પૂર્વ સીએમ સિદ્ધારમૈયા રાહુલ ગાંધી સાથે દોડવા લાગ્યા ત્યારનો વીડિયો પણ સોશિયલ મીડિયા પર વાયરલ થઈ ગયો છે. કોંગ્રેસના ઘણા નેતાઓએ આ વીડિયો શેર કર્યો છે. જયરામ રમેશે દિગ્વિજય સિંહને ટેગ કરીને લખ્યું કે 75 વર્ષની ઉંમરે સિદ્ધારમૈયા રાહુલ ગાંધી સાથે દોડી રહ્યા છે તે અસાધારણ છે. મીડિયા સાથે વાત કરતા સિદ્ધારમૈયાએ પણ દાવો કર્યો કે ભાજપ ભારત જોડો યાત્રાથી સંપૂર્ણપણે ડરી ગઈ છે.
કર્ણાટકમાં કોંગ્રેસની ભારત જોડો યાત્રા ચામરાજનગર, મૈસુર, મંડ્યા, તુમકુર, ચિત્રદુર્ગા, રાયચુર અને બેલ્લારીમાંથી પસાર થશે. અહીં 60 થી વધુ વિધાનસભા બેઠકો છે, એટલે આ યાત્રા કર્ણાટકમાં આગામી ચૂંટણી માટે નિર્ણાયક સાબિત થઈ શકે છે.
જણાવી દઈએ કે રાહુલ ગાંધી અને કોંગ્રેસના અન્ય કેટલાક નેતાઓ અને કાર્યકરોએ 7 સપ્ટેમ્બરે તમિલનાડુના કન્યાકુમારીથી ‘ભારત જોડો યાત્રા’ શરૂ કરી હતી. આ દિવસોમાં આ યાત્રા કર્ણાટકમાં છે. આગામી દિવસોમાં આ યાત્રા મહારાષ્ટ્ર, મધ્યપ્રદેશ, યુપી અને રાજસ્થાન જેવા રાજ્યોમાંથી પસાર થશે. આ યાત્રા આવતા વર્ષની શરૂઆતમાં કાશ્મીરમાં પૂરી થશે. આ યાત્રામાં કુલ 3,570 કિમીનું અંતર કાપવામાં આવશે. પાર્ટીએ રાહુલ સહિત 119 નેતાઓને “ભારત યાત્રી” તરીકે નામ આપ્યા છે જેઓ કાશ્મીર સુધી પદયાત્રા કરશે. આ લોકો 3,570 કિમીનું નિર્ધારિત અંતર કાપશે.