ઓનલાઇન મંગાવેલું બગડેલું દૂધ પડ્યું મોંઘું! રાજકોટની વૃદ્ધા refund લેતા લેતા ₹1.91 લાખ ગુમાવ્યા
રાજકોટમાં ઓનલાઈન મંગાવેલા બગડેલા દૂધનું refund મેળવવા જતા 63 વર્ષીય વૃદ્ધા સાયબર ઠગાઈનો શિકાર બની. ગઠિયાએ કસ્ટમર કેરના નામે ₹1.91 લાખ બેંક ખાતામાંથી ઉપાડી લીધા.
રાજકોટમાં ઓનલાઈન ખરીદી બાદ refund મેળવવાના બહાને થતી સાયબર ઠગાઈનો વધુ એક ચોંકાવનારો કિસ્સો સામે આવ્યો છે. શહેરની 63 વર્ષીય વૃદ્ધા શોભાબેન રાઠી ઓનલાઈન મંગાવેલા બગડેલા દૂધનું refund મેળવવા જતા ગઠિયાઓના જાળમાં ફસાઈ ગયા અને તેમના બેંક ખાતામાંથી ₹1.91 લાખથી વધુની રકમ ઉપાડી લેવામાં આવી.
આ ઘટના રાજકોટના જામનગર રોડ પર આવેલી ગાયત્રીધામ સોસાયટીમાં બની હોવાનું સામે આવ્યું છે. પ્રાપ્ત માહિતી મુજબ, શોભાબેને ઝેપ્ટો એપ મારફતે દૂધ મંગાવ્યું હતું. ઓર્ડર મળ્યા બાદ દૂધ બગડેલું હોવાનું જણાતા તેમણે કસ્ટમર કેરમાં ફરિયાદ કરી હતી.
ફરિયાદ બાદ પોતાને કસ્ટમર કેરના પ્રતિનિધિ તરીકે ઓળખાવનાર ગઠિયાએ વૃદ્ધાને refund પ્રક્રિયા માટે કેટલીક માહિતી આપવા સમજાવ્યા. ત્યારબાદ તેમના મોબાઇલમાં આવેલા સૂચનો અનુસાર કાર્યવાહી કરાવતા ગઠિયાએ તેમના બેંક ખાતામાંથી કુલ ₹1.91 લાખની રકમ ટ્રાન્સફર કરી લીધી.
રકમ કપાઈ જતાં વૃદ્ધાને છેતરપિંડીની જાણ થઈ હતી. ત્યારબાદ તેમણે રાજકોટ સાયબર ક્રાઈમ પોલીસનો સંપર્ક કર્યો હતો. પોલીસે ફરિયાદના આધારે ગુનો નોંધી તપાસ શરૂ કરી છે અને નાણાં કયા ખાતાઓમાં ટ્રાન્સફર થયા તેની માહિતી એકત્રિત કરવામાં આવી રહી છે.
સાયબર નિષ્ણાતોના જણાવ્યા અનુસાર, refund, કેશબેક અથવા કસ્ટમર કેરના નામે ફોન કરનાર અજાણ્યા વ્યક્તિને OTP, બેંક વિગતો, કાર્ડ નંબર, UPI PIN અથવા સ્ક્રીન શેરિંગ જેવી કોઈ પણ માહિતી આપવી જોઈએ નહીં. કોઈ પણ એપ અથવા વેબસાઇટનો સત્તાવાર કસ્ટમર સપોર્ટ નંબર જ ઉપયોગ કરવો જોઈએ.
આ ઘટના ફરી એકવાર ઓનલાઈન ખરીદી દરમિયાન સાવચેત રહેવાની જરૂરિયાત પર ભાર મૂકે છે.
