ગુજરાતને રૂ. ૯૦૦ કરોડના રેલવે પ્રકલ્પોની ભેટ, ગાંધીધામ-આદિપુર મલ્ટી-ટ્રેકિંગ પ્રોજેક્ટનું ઈ-લોકાર્પણ
Narendra Modi દ્વારા ગુજરાત રાજ્યને અંદાજિત રૂ. ૯૦૦ કરોડના વિવિધ રેલવે પ્રકલ્પોની ભેટ આપવામાં આવી છે. આ અંતર્ગત કચ્છ જિલ્લામાં મહત્વપૂર્ણ ગણાતા ગાંધીધામ-આદિપુર રેલવે વિભાગના મલ્ટી-ટ્રેકિંગ પ્રોજેક્ટનું રૂ. ૧૫૨ કરોડના ખર્ચે ઈ-લોકાર્પણ કરવામાં આવ્યું.
આ લોકાર્પણ વાવ-થરાદ ખાતેથી વર્ચ્યુઅલ રીતે કરવામાં આવ્યું હતું, જ્યારે Gandhidham Railway Station ખાતે આયોજિત કાર્યક્રમમાં કચ્છના પ્રભારી મંત્રી કાંતિલાલ અમૃતિયા અને ઉચ્ચ તેમજ ટેક્નિકલ શિક્ષણ રાજ્યમંત્રી ત્રિકમભાઈ છાંગાની ઉપસ્થિતિ રહી.
કાર્યક્રમમાં જણાવાયું હતું કે વડાપ્રધાનના વિઝન હેઠળ રેલવે સહિતના પરિવહન ક્ષેત્રોમાં નોંધપાત્ર વિકાસ થયો છે, જેના કારણે દેશના નાગરિકોને આધુનિક અને વિશ્વકક્ષાની સુવિધાઓ ઉપલબ્ધ થઈ રહી છે. રેલવેના આધુનિકીકરણથી મુસાફરી વધુ આરામદાયક અને વિશ્વસનીય બની છે.
ગાંધીધામ-આદિપુર મલ્ટી-ટ્રેકિંગ પ્રોજેક્ટ કચ્છના ઔદ્યોગિક અને આર્થિક વિકાસ માટે મહત્વપૂર્ણ સાબિત થશે. અંદાજિત ૧૧ કિમી લંબાઈ ધરાવતા આ પ્રોજેક્ટથી રેલવે કનેક્ટિવિટી મજબૂત બનશે તેમજ કાર્ગો પરિવહન વધુ ઝડપી અને સસ્તું બનશે. દીનદયાળ પોર્ટ અને મુન્દ્રા પોર્ટ સાથે જોડાણ વધુ કાર્યક્ષમ બનતા આયાત-નિકાસ પ્રક્રિયામાં ગતિ આવશે.
આ પ્રોજેક્ટના અમલીકરણથી ટ્રેનોના સંચાલનમાં ઝડપ અને વિશ્વસનીયતા વધશે, સાથે જ નવા પેસેન્જર અને માલગાડી સેવાઓ માટે તકો ઊભી થશે. કૃષિ અને ઔદ્યોગિક ક્ષેત્રને સીધો લાભ મળશે તેમજ લોજિસ્ટિક્સ ખર્ચમાં ઘટાડો થશે.
ઉલ્લેખનીય છે કે આ સાથે ગુજરાતમાં અન્ય મહત્વપૂર્ણ રેલવે પ્રકલ્પોનો પણ લોકાર્પણ અને શુભારંભ કરવામાં આવ્યો, જેમાં હિંમતનગર-ખેડબ્રહ્મા રેલવે લાઇન, નવી ટ્રેન સેવા અને કાનાલુસ-જામનગર રેલવે ખંડના ડબલિંગ જેવા પ્રોજેક્ટ્સનો સમાવેશ થાય છે.
ભારતીય રેલવે દ્વારા આવા વિકાસલક્ષી પ્રોજેક્ટ્સના અમલીકરણથી રાજ્યમાં કનેક્ટિવિટી સુધરશે, રોજગારીની તકો ઊભી થશે અને પ્રાદેશિક આર્થિક વિકાસને નવી દિશા મળશે.
વધુ સમાચારો માટે અહીં ક્લિક કરો