અમદાવાદમાં કિન્નરો દ્વારા પજવણી પર કડક નિયંત્રણ: પોલીસ કમિશનરનું જાહેરનામું
જી.એસ. મલિક દ્વારા અમદાવાદ શહેરમાં ટ્રાન્સજેન્ડર (કિન્નર) સમુદાય દ્વારા કરવામાં આવતી પજવણી અને મોટી રકમની જબરદસ્તી માંગણી રોકવા માટે મહત્વપૂર્ણ જાહેરનામું બહાર પાડવામાં આવ્યું છે. આ નિર્ણય નાગરિકોની સુરક્ષા અને શાંતિ જાળવવા માટે લેવામાં આવ્યો છે.
જાહેરનામા મુજબ, લગ્ન પ્રસંગ, બાળકના જન્મ અથવા અન્ય શુભ પ્રસંગોએ કિન્નરો દ્વારા ચોક્કસ મોટી રકમ (જેમ કે ₹11,000 કે ₹21,000) માટે દબાણ કરવાનું સંપૂર્ણપણે મનાઈ છે. નાગરિકો પોતાની ઇચ્છા મુજબ જે રકમ આપે, તે જ સ્વીકારવાની રહેશે.
આ ઉપરાંત, પૈસા મેળવવા માટે કરવામાં આવતી અશોભનીય હરકતો જેમ કે અશ્લીલ વર્તન, ગાળાગાળી, કપડાં ઉતારવાની ધમકી વગેરે પર કડક પ્રતિબંધ મૂકવામાં આવ્યો છે. કોઈના ઘરે જબરદસ્તી પ્રવેશ કરવો અથવા રસ્તા પર રોકીને પૈસા માંગવા જેવી પ્રવૃત્તિઓને ગુનાહિત ગણવામાં આવશે.
ટ્રાફિક વ્યવસ્થાને ધ્યાનમાં રાખીને, શહેરના ચાર રસ્તા અને ટ્રાફિક સિગ્નલ પર વાહનચાલકો પાસે પૈસા માંગવા પર પણ પ્રતિબંધ મૂકાયો છે, કારણ કે તેનાથી અકસ્માતની શક્યતા વધે છે.
જાહેરનામાના ભંગ બદલ ભારતીય ન્યાય સંહિતા (BNS) હેઠળ કલમ 223 અને અન્ય લાગુ પડતી કલમો મુજબ કાયદેસરની કાર્યવાહી કરવામાં આવશે. પોલીસને આવા કેસોમાં કડક પગલાં લેવા માટે સત્તા આપવામાં આવી છે.
પોલીસે નાગરિકોને અપીલ કરી છે કે જો કોઈ વ્યક્તિ મોટી રકમ માટે દબાણ કરે અથવા ધમકી આપે, તો તેઓ તરત જ 100 અથવા 112 નંબર પર સંપર્ક કરે અથવા નજીકના પોલીસ સ્ટેશનમાં ફરિયાદ નોંધાવે.
પોલીસે સ્પષ્ટ કર્યું છે કે આ જાહેરનામાનો હેતુ ટ્રાન્સજેન્ડર સમુદાયને હેરાન કરવાનો નથી, પરંતુ ‘આશીર્વાદ’ના નામે થતી ખંડણી જેવી પ્રવૃત્તિઓને રોકવાનો છે, જેથી સમાજમાં સૌ કોઈ સન્માન અને શાંતિથી રહી શકે.