માંડવીમાં પશુ દવાખાનાનું નવું ભવન અને રૂક્માવતી નદીના પટમાં ૪ નવા બોરનું ખાતમુહૂર્ત ધારાસભ્ય હસ્તે કરાયું
માંડવીમાં પશુ દવાખાનાનું નવું ભવન અને રૂક્માવતી નદીના પટમાં ૪ નવા બોરનું ખાતમુહૂર્ત ધારાસભ્ય હસ્તે કરાયું
માંડવીના વિકાસ કાર્યોને વેગ આપતા, માંડવીના ધારાસભ્ય શ્રી અનિરુદ્ધભાઈ દવેના હસ્તે બે મહત્વના પ્રોજેક્ટ્સનું ખાતમુહૂર્ત કરવામાં આવ્યું. આ પ્રોજેક્ટ્સમાં માંડવીના મુખ્ય પશુ દવાખાનાના આધુનિક નવા ભવનનું નિર્માણ અને રૂક્માવતી નદીના પટમાં ૪ નવા પાણીના બોરનો સમાવેશ થાય છે.
માંડવીમાં પશુપાલકોની સુવિધા અને પશુઓને વધુ સારી સારવાર મળી રહે તે હેતુથી એક આધુનિક પશુ દવાખાનાનું નવું ભવન બનાવવામાં આવશે. આ ભવનમાં પશુઓ માટે ઓપરેશન સહિતની અત્યાધુનિક સારવાર ઉપલબ્ધ થશે, જેથી પશુપાલકોને સગવડતા રહેશે. આ નવા ભવનનું ખાતમુહૂર્ત ધારાસભ્ય શ્રી અનિરુદ્ધભાઈ દવે દ્વારા કરવામાં આવ્યું હતું.
માંડવી નગરને પાણી પૂરું પાડતા બોર રૂક્માવતી નદીના પટમાં આવેલા છે, જેના કારણે નદીમાં પાણીનું સ્તર વધે ત્યારે તે ડૂબી જાય છે અને પાણી પુરવઠામાં અવરોધ ઊભો થાય છે. આ સમસ્યાના કાયમી નિરાકરણ માટે, નદી પટથી થોડા ઊંચાણવાળા ભાગે ૪ નવા બોર બનાવવાનો નિર્ણય લેવાયો છે.
આ નવા બોરના નિર્માણથી ભવિષ્યમાં પાણી પુરવઠો સુચારુ રૂપે ચાલુ રહેશે અને નગરજનોને કોઈ તકલીફ પડશે નહીં. પાણી પુરવઠા ચેરમેન શ્રી પારસભાઈ માલામના જણાવ્યા અનુસાર, આ પ્રોજેક્ટથી નગરની સુખાકારીમાં વધારો થશે. આ ૪ બોરના ખાતમુહૂર્તનું કાર્ય પણ ધારાસભ્ય શ્રી અનિરુદ્ધભાઈ દવેના હસ્તે સંપન્ન થયું.
આ પ્રસંગે માંડવી શહેર ભાજપ પ્રમુખ શ્રી દર્શનભાઈ ગોસ્વામી, નગરપાલિકા પ્રમુખ શ્રી હરેશભાઈ વિંઝોડા, કારોબારી ચેરમેન શ્રી વિશાલભાઈ ઠક્કર, મહામંત્રી શ્રી કમલેશભાઈ ગઢવી, સત્તાપક્ષ નેતા શ્રી લાંતીકભાઇ શાહ, તેમજ અન્ય સદસ્યો, સંગઠનના હોદ્દેદારો, પાણી પુરવઠા વિભાગના અધિકારીઓ અને સ્ટાફ સહિત મોટી સંખ્યામાં પાર્ટીના કાર્યકર્તાઓ ઉપસ્થિત રહ્યા હતા.