Ahmedabad અમદાવાદમાં રિક્ષા-ટેક્સી ચાલકોની 4 દિવસની હડતાળનું એલાન
Ahmedabad ઇંધણના વધતા ખર્ચ અને ઓનલાઈન કેબ સર્વિસમાં મળતા ઓછા વળતર સહિતની વિવિધ માંગણીઓને લઈને અમદાવાદના રિક્ષા અને ટેક્સી ચાલકોએ ચાર દિવસની હડતાળનું એલાન કર્યું છે. ચાલકોના જણાવ્યા મુજબ, આગામી 7થી 10 સપ્ટેમ્બર દરમિયાન અમદાવાદ, ગાંધીનગર અને સાણંદ વિસ્તારમાં રિક્ષા-ટેક્સી સેવા બંધ રાખવામાં આવશે.
ચાલકોના સંગઠનોનો દાવો છે કે છેલ્લા કેટલાક સમયથી CNGના ભાવમાં વધારો થતાં તેમની રોજિંદી કમાણી સામે ખર્ચનું પ્રમાણ વધી રહ્યું છે. બીજી તરફ, ભાડામાં થયેલા વધારા છતાં તેનો પૂરતો લાભ ચાલકો સુધી પહોંચતો ન હોવાની ફરિયાદ છે.
Ahmedabad ઓનલાઈન કેબ કંપનીઓ સામે રોષ
રિક્ષા-ટેક્સી ચાલકોનો મુખ્ય વિરોધ ઓનલાઈન બુકિંગ પ્લેટફોર્મને લઈને પણ છે. ચાલક સંગઠનોના આક્ષેપ મુજબ, ઓલા, ઉબર, રેપિડો સહિતની એપ આધારિત સેવાઓમાં કંપનીઓ વચ્ચેની સ્પર્ધાને કારણે મુસાફરો પાસેથી ઓછું ભાડું લેવામાં આવે છે અને તેના કારણે ડ્રાઈવરોને મળતી આવક પણ ઘટી રહી છે.
ચાલકોનું કહેવું છે કે વાહનનો ઇંધણ ખર્ચ, જાળવણી, વીમો અને અન્ય ખર્ચ બાદ મળતી આવક પરિવારનું ગુજરાન ચલાવવા માટે પૂરતી રહેતી નથી.
Ahmedabad ખાનગી નંબર પ્લેટવાળા વાહનોનો મુદ્દો
યુનિયનો દ્વારા અન્ય એક મહત્વનો મુદ્દો ખાનગી નંબર પ્લેટવાળા બાઈક અને અન્ય વાહનો દ્વારા એપ આધારિત મુસાફરી સેવા આપવાનો છે. રિક્ષા-ટેક્સી ચાલકોનો આક્ષેપ છે કે આવા વાહનો નિયમિત પરમિટ ધરાવતા વ્યવસાયિક વાહનોની આવકને અસર કરી રહ્યા છે.
આ મામલે અગાઉ પણ સંબંધિત વિભાગોમાં રજૂઆતો કરવામાં આવી હોવાનો ચાલકોનો દાવો છે. તેમ છતાં સંતોષકારક કાર્યવાહી ન થતાં હવે હડતાળનું પગલું ભરવામાં આવ્યું હોવાનું સંગઠનોનું કહેવું છે.
Ahmedabad ઓનલાઈન ટેક્સીના ભાડા અંગે પણ સ્પષ્ટતાની માંગ
ટેક્સી ચાલકોના સંગઠન દ્વારા ઓનલાઈન ટેક્સીના ભાડા માટે સ્પષ્ટ સરકારી માળખું નક્કી કરવાની માંગ કરવામાં આવી છે. ચાલકોના જણાવ્યા પ્રમાણે, મીટર આધારિત ટેક્સી માટેના દર અને એપ આધારિત ટેક્સી સેવાઓના દરમાં સ્પષ્ટતા હોવી જરૂરી છે.
ચાલકોનું કહેવું છે કે યોગ્ય ભાડું નક્કી થાય અને એપ કંપનીઓ દ્વારા ડ્રાઈવરોને યોગ્ય વળતર મળે તો મુસાફરોને સેવા આપતા ડ્રાઈવરો પરનો આર્થિક બોજ ઘટાડી શકાય.
Ahmedabad માંગણીઓ નહીં સંતોષાય તો રાજ્યવ્યાપી આંદોલન
હાલમાં જાહેર કરાયેલ હડતાળ અમદાવાદ, ગાંધીનગર અને સાણંદ વિસ્તાર પૂરતી રાખવામાં આવી છે. જો સરકાર દ્વારા ચાર દિવસ દરમિયાન પ્રશ્નોનું નિરાકરણ નહીં આવે તો આગામી તબક્કામાં સમગ્ર ગુજરાતમાં આંદોલન કરવાની ચીમકી આપવામાં આવી છે.
સંગઠનો દ્વારા RTO કચેરીઓ તેમજ ગાંધીનગર સ્થિત સંબંધિત સરકારી કચેરીઓ સુધી રેલી અને ઘેરાવ જેવા કાર્યક્રમો યોજવાની પણ ચેતવણી આપવામાં આવી છે.
હડતાળને કારણે અમદાવાદ સહિત આસપાસના વિસ્તારોમાં મુસાફરોને મુશ્કેલી પડી શકે છે. હવે સરકાર અને રિક્ષા-ટેક્સી સંગઠનો વચ્ચેની ચર્ચા બાદ આ હડતાળ ટળે છે કે પછી વધુ વ્યાપક આંદોલનનું સ્વરૂપ લે છે તેના પર સૌની નજર રહેશે.
